الذهب لحامد زيد

ياكثر مارافقت خلان وأحباب..
وياكثر مافي شدتي هملوني..
على كثر ماعدهم ستر وحجاب..
على كثر ماحتجتهم وتركوني..
من صارت الخوه ثمن حفنة تراب..
نفس الوجيه الي نصوني..نسوني..
من غير ذكر عروق..وفروق..وأنساب..
كانوا ثلاثه..والثلاثه جفوني..
علمتهم وشلون الأهداف تنصاب..
ولما سواعدهم قوت..صوبوني..
عشاني اصغرهم عمر..صاروا احزاب..
عشاني اصدقهم قصيد..اظلموني..
الي نجح اسمي زرع فيهم انياب..
حتى النصيحه مابغوا ينصحوني..
دام العطايا عندهم دين واتعاب..
والله لو اطلب ذنبهم ماعطوني..
طالب نصيحه كني مطالب رقاب..
وهي نصيحه..كيف لو زوجوني..
كنت اكتب لنفسي مشاريه وعتاب..
ولاادري ان اللي قروني..قروني..
تضاربت من دوني عقول والباب..
واجد بغوا غيري..وواجد بغوني..
اقبل هدب تسهر على شعري اهداب..
كني حبست رقادهم..في جفوني..
لو شفتهم واحد..يشوفوني اسراب..
من وين مالدوا نظرهم..لقوني..
اثري وجودي بينهم محرق اعصاب..
ومزعل بعضهم من بعض..لو طروني..
ياكبري بعيني..وانا توني شاب..
وأهم كتاب الشعر حاربوني..
حتى ولو يهوي على نجمي شهاب..
يكفيني ان اسمي كبير بعيوني..
كد قال ابوي..ان هبتهم..قول..ماهاب..
لو يقدرونك.. قول..ماتقدروني..
ومدام قبري محتضن راس مرقاب..
على كثر ماتقدرون ادفنوني..
لو ماني بذيب..انهشت عظمي ذياب..
لو ماقدرت اثبت وجودي..لغوني..
لو ماسكنت وجيههم..مت بغياب..
لو ماعرفت امحي ورقهم..محوني..
ماجيت ابدبل كبدهم شعر وخطاب..
لين ادبلو كبد الذي خلفوني